LAOAG CITY – Kalikagum ti Sangguniang Panlungsod ditoy siudad ti Laoag a maaddaan ti opisina ti lokal a gobierno a mangawat kadagiti emergency calls dagiti residente.
Inbatad ni Konsehal Jason Perera, daytoy ket kalpasan a timmawag isuna iti hotline ti Laoag City Police Station ngem awan ti sumungsungbat.
Inlawlawagna a basar iti panangduktalna iti napasamak ket naammoanna a lowbat ti selpon.
Gapu iti daytoy, insingingasing ni Atty. Perera nga agadaptar ti lokal a gobierno iti agdama a moderno a teknolohia.
Mainaig iti daytoy, inpettengna a pudno nga adda ti 911 hotline number ditoy pagilian para kadagiti emergency call ngem mabalin a daytoy ket mangkonsumo laeng iti oras agingga a maidanon ti emergency concern ti maysa a tao iti opisina a rumbeng a pakaipadanonanna.
Innayonna a nasaysayaat no mapagbalin a localize daytoy tapno al-alisto ti pannakikoordinar ken pannakaipadanon ti tulong.
Kabayatanna, immanamong ti Presiding Officer ti Sangguniang Panlungsod seknan iti daytoy a banag ken nakikoordinar iti national agencies tapno ammoen dagiti kasapulan tapno makaestablisar ti local system ditoy siudad ti Laoag.
