LAOAG CITY – Inlawlawag ni Mx. Pat Quitoriano, Local Youth Development Officer iti ili ti Pagudpud nga agtultuloy ti naiyestablisar a community pantry iti town plaza agingga a kabaelan da ken ado dagiti tumulong.
Segun kenni Quitoriano, ti kangrunaan a gagem da iti panangiyestablisar da met iti community pantry ket tapno tulungan dagiti kailyan da a saan a makabael a gumatang iti ipauneg da iti maysa nga aldaw.
Inbatad na malaksid iti town plaza, plano da pay ti mangipatakder iti nagduduma a barangay tapno sapasap a matulungan amin nga agkasapulan iti nadakamat nga ili.
Dinakamat na a sipud idi naipost da iti facebook daytoy ket ado dagiti agkasapulan a napan nagpila ken ado met dagiti nagidonar.
Kunana a nakita da ti ragsak dagiti tattao a natulungan babaen iti daytoy.
Mainaig iti daytoy, mangnamnama ni Quitoriano a saan a maabuso ti community pantry ken maipabagi kuma lattan kadagiti kailyan a saan a makabael a gumatang ti kanen da iti uneg ti maysa nga aldaw.
