LAOAG CITY – Agbirbiruk ti lokal a gobierno kadagiti mabalin a pagparkingan dagiti behikulo kangrunaanna iti sentro ditoy siudad ti Laoag.
Daytoy ti inpakaammo ni Ms. Jeniffer Frances Gapuzan, Community Affairs Officer II ti Community Affairs Office ditoy siudad.
Segun kenkuana, adu dagiti lugan nga agturturong ditoy siudad a ti kangrunaan a problemada ket iti pagparkingan dagiti luganda.
Inlawlawagna a gapu iti kinakurang wenno kinaawan ti pagparkingan dagiti motorista ket masansan nga iparparkingda dagiti luganda kadagiti saan nga umiso wenno naikeddeng a pagparkingan kas kadagiti adda ti traffic signage a “No Parking.”
Kunana nga arig saanda a mabuteng ti panagmultada ti 150 a pisos isut gapuna a kalikagumna a maipangato ti multa dagiti aglabsing iti daytoy a pagannurotan tapno naan-anay nga agtungpalda.
Innayonna a rumbeng a suruten dagitoy a pagalagadan gapu ta dagitoy a panaglabsing ket mai-report iti Land Transportation Office.
