LAOAG CITY – Inpakaammo ni Vice Mayor Jonathan De Lara iti ili ti Solsona a plano ti lokal a gobierno iti ili ti Solsona nga agkiddaw ken ni Gov. Matthew Marcos Manotoc para iti pannakaisayangkat ti Open Quarry.
Segun kenkuana, babaen iti daytoy ket malapdan ti nakaro a pannakalayos dagiti residente ti siyam a barangay iti nasao nga ili kangrunaanna iti Barangay Maananteng, Nalasin ken Lipay.
Inbatadna a gapu ta awan ti maaramidan ti gobierno probinsial ken gobierno municipal para iti rehabilitation ti pannakadadael ti dike agsipod ta aggapu iti gobierno nasional ti mabalin a pangalaan ti pondo a pangpatarimaan ket insingasingda iti gobernador ti panangipatungapal ti Open Quarry.
Inlawlawagna a nadadael ti pagayusan ti danum kalpasan iti iduduprak ti Bagyo Egay ditoy probinsia no sadino ket dagusda a tinarimaan nga immabot iti 300 ribu a pisos ti nagastosda.
Nupay kasta, inpalgakna a nasayang met laeng ti bannog ken naibusbos a kuarta gapu ta dinadael met laeng daytoy ti Bagyo Goring iti kallabes rason a kimmaro ti situasion a makaapektar ti naruay nga umili.
Gapu iti daytoy, kunana a nagsasaritada dagiti plano ken istratehiya tapno maisubli ti dati a dalan ti pagayusan ti danom tapno maliklikan a malayos dagiti maseknan a residente babaen iti panagtitinnulong dagiti quarry operators nga agkutkot iti pagtarayan ti danom.
Mainaig iti daytoy, kalikagum ni Vice Mayor De Lara a mapatgan daytoy a kiddawda tapno saanen a maulit pay ti napasaran a nakaro a layos dagiti siyam a barangay iti ili ti Solsona nangruna no adda dumteng a napigsa a tudo wenno bagyo.
Immuna iti daytoy, kunana nga adda ti naiyuswat a panagtataripnong ti Committee on Environment pakairamanan ti Quarry Council, Department of Public Works and Highways ken dadduma pay para iti pannakasolbar ti arungaing dagiti umili.
Kabayatanna, iti agdama manarimaan nga agsagsagana dagiti maseknan a residente nga agikabkabil ti pangabbeng kadagiti pagtaenganda tapno saanda a malayos a maminpinsan.
