LAOAG CITY – Selebraran ni Nana Liocadia Agcaoili Garganta a residente ti Brgy. Salet ditoy siudad ti Laoag ti maika-100 a panagkasangayna inton bigat, Disiembre 9.
Segun kenkuana, addaan isuna ti sangapulo nga annak ngem tallo kadagitoy ket pimmusayen ken agarup 30 ti apokona.
Inbatadna a nagpatingga laeng iti maikapat a tukad iti elementaria ti panagbasana.
Inlawlawagna nga idi kaubinganna ket napadasanna ti napan nangisuro kadagiti ubbing iti lugarda.
Kunana a narigat ken simple laeng ti panagbiagda gapu ta ikarkarigatanda ti mapan aglako ti nagduduma a klase ti nateng kas ti balangeg tapno masupusupan dagiti kasapulanda iti inaldaw-aldaw.
Mainaig iti daytoy, kuna ni Mrs. Linda Garganta, maikadua nga anak ni Nana Liocadia a nagserbi ti inana iti naunday a panawen iti bukudda a barangay no sadinno nga isuna ti mangipagpagna ti pannakaiproseso ti dokumento dagiti kaipasngay a maladaga.
Kabayatanna, inburay met ni Nana Liocadia ti sikretona no apay nga atiddog ti biagna gapu ta kankanayon daytoy a mangmangan ti nateng ken liklikanna ti mangan ti karne.
