LAOAG CITY – Naiyakar iti pannakairubuat ti Long March 8A rocket ti China inton Pebrero, basar iti Office of Civil Defense (OCD).
Inbatad ti Office of Civil Defense a mangiruar ti Philippine Space Agency (PhilSA) ti baro a rakurak apaman a makumpirmaran ti baro a petsa.
Inisyal a naikeddeng ti panangirubuat ti Long March 8A rocket idi Sabado, alas-5:53 ti malem ken alas-6:42 ti malem manipud iti Wenchang Spacecraft Launch Site iti Hainan Province.
Kas panagsagsagana iti daytoy, temporario nga inpawil ti Bureau of Fisheries and Aquatic Resources (BFAR) ti fishing activities iti Rozul Reef ken iti kabaybayan ti Puerto Princesa, Palawan, manipud iti alas-5 ti malem agingga iti alas-9 ti rabii ti Enero 25 agingga ita nga aldaw Enero 27 gapu iti peggad ti bumagsak a rocket debris.
Naduktalan ti tallo a potential rocket debris drop zones. Nangiparuk-at met ti Office of Civil Defense ti memorandum a nangibilin kadagiti maseknan nga ahensia a siguraoden ti kinatalged ti publiko iti maapektaran a coastal areas.
