LAOAG CITY – Inlawlawag ni Atty. Mark Anthony Espenilla, ti Acting Chief ti Transportation Development Officer iti Land Transportation Franchising and Regulatory Board (LTFRB) – Rehiyon Uno a mabalin ti agpidot ti pasahero dagiti pampasahero a jeep ken bus iti mall ditoy ciudad ti Laoag ngem saan da a mabalin ti agtalinaed iti lugar.
Kuna na nga awan ti problema iti panagpidot ti pasahero iti mall dagiti pampubliko a transportasyon basta madalanan da laketdi ngem kasapulan latta nga agderetso dagitoy iti destinasyon wenno terminal da iti sentro ditoy ciudad ti Laoag.
Inpetteng ni Atty. Espenilla a no agderetso dagiti pampasahero a jeep wenno dagiti bus iti mall tapno isu ti pagurayan ken pagalaan dan ti pasahero ket maibilang daytoy a cutting trip.
Inpaganetget na pay a masapol a suruten dagiti maseknan no ania ti nakailanad iti prangkisa da tapno awan ti malabsing da a pagannurutan seknan iti panagoperar da.
Kuna na a no bilang addan ton ti maaramid a resolusyon ditoy ciudad ti Laoag a mangibagbaga a dagiti transport operators ket maikabil aminen ti terminal da iti mall.
Kabayatanna, inbatad ni Atty. Espenilla a no dagiti met aggapo iti ciudad ti Batac ket masapol nga agderetso da iti sentro ti ciudad ti Laoag tapno isu ti pagibabaan da amin dagiti pasahero da saan ketdi a mapanda agidissaag iti mall.
Gapu iti daytoy, inkari na a pagsasaritaan da a naimbag dagitoy a problema tapno masolusyonan, gapu ta iti baet a mapenepisyaran dagiti commuters ket maapektaran met dagiti dadduma a transport operators.
Immuna iti daytoy, adda dagiti naidanun a reklamo ditoy Bombo Radyo a maipagarop nga adda dagiti pampasahero a jeep a maipagarop nga agderetso dan iti mall tapno isu ti pagurayan wenno pagalaan da ti pasahero.
