LAOAG CITY – Inisyoan ti Land Transportation Franchising and Regulatory Board (LTFRB) ti walo a bus companies gapu iti iligal a panagipangto da ti plete nga awan ti panangaprubar ti gobierno.
Segun ken ni Land Transportation Franchising and Regulatory Board chairperson Vigor Mendoza II, sumango dagiti nasao a kompaniya ti bus iti possible a suspensiyon wenno naan-anay a pannaka-kanselar ti certificate of public convenience, maysa a napateg a dokumento para kadagiti operasyon ti pampubliko a transportasyon.
Karaman kadagiti napaawagan ket ti sumagmamano a bus companies nga agop-operar manipod iti ruta iti Bicol region.
Naamoan a ti rason dagiti kumpaniya ket nangato a presyo ti langis para iti umento iti plete.
Inpetteng ti opisyal a maawatan da dagiti karit a sangsangwen dagiti kompanya dagiti bus ken dadduma nga operator ti pampubliko a transportasyon ngem saan a rumbeng nga usaren dagitoy kas rason tapno labsingen dagiti maipatpatungpal a pagannurutan a mangpadagsen kadagiti commuters.
Innayon ti LTFRB Chief, a saan a nakaaawat daytoy ken masapol nga agpalawag da no apay a saanda a rumbeng a mapatawan ti pannusa.
Mainaig iti daytoy, naibilin kadagiti walo a bus companies a mangisumitir ti pormal a palawag iti uneg ti 10 nga aldaw apaman a maawat ti show cause order ken idetalye no apay a saan da mapatawan ti pannusa iti panagnayun da ti plete.
Nangisyu pay ti Land Transportation Franchising and Regulatory Board ti cease and desist order, a mangibilbilin iti amin nga apektado a kompanya nga isardeng da a dagus ti panagnayun ti plete kadagiti pasahero.
Naikeddeng ti formal hearing iti walo a kompanya ti bus intono Abril 23 ita a tawen.
Nagballaag met ti ahensya kadagiti kompanya a mapaay a mangisumitir ti palawag wenno agatendar iti panagdengngeg a mabalin a sumango da nayun a pannusa administratibo ken mapatawan da ti multa.
