LAOAG CITY – Naiget ti panagbantay dagiti opisyal ti barangay ken tanod iti ligason ti nagpositibo iti covid-19 iti Brgy. 11 ditoy siudad ti Laoag.
Daytoy ti inpakaammo ni Brgy. Chairwoman Bernadine de Leon iti Brgy. 11 ditoy siudad ti Laoag.
Inpakaammo ni de Leon, adda ti siyam a pamilya iti ligason ni IN-C1006 a naapektaran ti lockdown pakairamanan ti pito a kapamilya daytoy.
Mainaig iti daytoy, kuna na a manamnama a maipadalan iti swab testing dagiti naipan iti lockdown ken agtultuloy ti contact tracing kadagiti nakapulapol ti pasyente.
Innayun na nga iti agdama ket nagtalinaed iti ospital ti pasyente kalpasan a symptomatic wenno addaan daytoy ti sintomas ti covid-19.
