LAOAG CITY – Inpeksa ni Mayor Michael Marcos-Keon ditoy ciudad ti Laoag ti pannakipagladingit na iti pamilya ti pimmusay nga atleta a ni Lydia de Vega gapu iti sakit a cancer.
Ni de Vega ket nadiskubre ni Mayor Keon kabayatan ti Gintong Alay Program no sadinno a daytoy idi ti executive director.
Ti Gintong Alay Project ket national sports program ti gobierno probinsyal a naiya-ammo iti babaen ti administrasyon ni Presidente Ferdinand Marcos.
Inbatad ni Mayor Keon a ni de Vega ket maibilang a pioneer iti lubong ti ay-ayam gapu kadagiti nagbalin a kontribusyon na a nakaidaydayawan ti Pilipinas.
Ibilang ti mayor ni de Vega kas “Greatest runner” iti intero nga Asya ngem saanna a kinabaelan nga inabak dagiti African runners.
Innayon na a ni de Vega ti kaadoan ti nagun-od a medalya kadagupan kadagiti babbai nga atleta ti Pilipinas kangrunaan na iti biang ti track and field.
Mangnamnama ti mayor nga iti pannakatay ni de Vega ket mangitunda ti panangipaay dagiti Pilipino
ti naan-anay nga atensyon iti biang ti sports ditoy pagilyan kangrunaan na ti track and field.
Inpasingked ti mayor nga aramiden da amin a kabaelan da tapno maipakita da ti pannakipagrikna da iti pamilya ni de Vega.
Kuna na pay nga amin a dati nga atleta ken coaches iti Gintong Alay Project ket mapan danto kitaen iti maudi a gundaway ni de Vega.
Mainaig iti daytoy, kuna ni Keon a mangnamnama pay a bayadan ti gobierno national ti hospital bill ni de Vega.
Kuna na pay a nakisaritan ken ni Congressman Sandro Marcos no sadinno nga inlawlawag na a tumulong koma ti administrasyon nga agbayad iti bill ni de Vega iti ospital.
Immun-unan nga inmandar ni Presidente Bongbong Marcos Jr. iti Philippine Sports Commission ken Philippine Olympic Committee ti panangipaay da ti pinansyal a tulong ken ni de Vega.
Nupay kasta, kuna ti mayor a kasapulan latta ti tulong ti gobierno national kangrunaan na ket minilyon a pisos ti nagastos ti pamilya tapno maisalbar koma laeng ti biag ti nasao nga atleta.
