LAOAG CITY – Plano ti Philippine Health Insurance Corp. (PhilHealth) a sakupen dagiti magastos para kadagiti mairesreseta nga antsukos sakbay nga agngudo ti tawen.
Inbatad ni Dr. Israel Francis Pargas, PhilHealth Senior Vice President for Health Finance Policy a manarimaanen ti panagadal ti pannakairaman dagiti prescription glasses kas sungbat ti kiddaw kadagiti miembro ken agpanpanday linteg.
Inbatadna a mangnamnama isuda a sakbay nga agleppas ti tawen ket maiparuk-aten ti pagannurutan maipanggep daytoy a banag.
Basar iti panagadal ti World Health Organization, 50% ti world’s population ket agbalin a near-sighted inton 2050.
Iti 2018 Philippine Eye Disease Study, 1.98% ti populasion ti Pilipinas ket addaan ti visual impairment idinto a dua a milyon ti partially blind.
Ti Integrated Philippines Associate of Optometrists (IPAO) ket tumulong iti PhilHealth iti panangaramid kadagiti pagalagadan para iti package.
Naammoan a dagiti menor de edad nangruna kadagiti estudiante ti maipangpangruna iti phase one ti PhilHealth package gapu ta makaapektar daytoy iti academic performance dagiti ubbing a near-sighted wenno far-sighted a kondision.
Kabayatanna, sakbay nga agngudo ti tawen ket gagem pay ti PhilHeath nga iraman ti serbisio iti ngipen kadagiti pakete daytoy pakairamanan ti dental hygiene, flourification ken cleaning.
