LAOAG CITY – Naiballaag ti panagraira ita ti artificial wenno magic sugar iti merkado publiko a masalakniban ti salun-at dagiti consumer.
Segun ken ni Sugar Regulatory Administration Administrator Pablo Luis Azcona, ti magic sugar nga am-ammo met iti aspartame ket maysa a chemical compound sweetener a kangrunaan a maus-usar kadagiti mainom a posible a mangitunda iti peggad iti salun-at.
Masansan daytoy nga us-usaren dagiti negosiante gapu ta nalaklaka daytoy.
Inbatadna a saan a nalawag iti Sugar Regulatory Administration no ania dagiti ahensia ti agre-regulate iti nasao a sugar substitute nangruna ita nga adu dagiti tattao ti aglaklako ken umin-inum gapu iti kinabara ti panawen.
Kunana a pagam-amkan pay daytoy ti posibilidad a naipuslit iti Pilipinas a saan a dimmalan kadagiti serye ti customs process.
Iti Commonwealth Market idiay Quezon City, magatang ti magic sugar iti balor a P35 per pack idinto ti presio ti puraw nga asukar ket adda iti nagbaetan ti P80 agingga P95 per kilo.
Maipalagip a ti artificial sweetener ket immunan a naipawil ditoy pagilian idi 2000 gapu ta nangitunda daytoy ti pangta iti salun-at iti publiko ngem naikkat daytoy kalpasan ti 13 a tawen ti Food and Drug Administration.
