LAOAG CITY – Nagballigi dagiti otoridad a nangarestar iti maibilang kas High Value Individual iti Barangay 10, San Jose ditoy ciudad ti Laoag.
Ti anti-illegal drug operation ket nagbibinnuligan nga insayangkat ti nagtitipon a pwersa ti Philippine Drug Enforcement Agency Regional Office I – Ilocos Norte Provincial Office (PDEA RO I – INPO), Laoag City Police Station, Police Regional Office I- Regional Intelligence Division-Ilocos Norte Police Provincial Office- Provincial Drug Enforcement Unit ken ti Regional Intelligence Unit- Provincial Intelligence Team.
Naisayangkat ti operasyon kalpasan a nakumpirmaran babaen ti intelligence reports ti agtultuloy nga illegal nga aktibidad ti suspek a rumrumuar nga adda ti koneksyon na iti drug group nga agop-operar ditoy probinsya.
Binigbig ni Philippine Drug Enforcement Agency Regional Office I, Regional Director, Atty. Benjamin G. Gaspi, ti suspek a ni alias Ryan, miembro ti Burog Drug Group, a residente ti Barangay 29, Santo Tomas ditoy ciudad ti Laoag.
Nakumpiskar dagiti otoridad iti naisayangkat nga operasyon ti lima a pedaso ti heat-sealed transparent plastic sachet a maipagarop a naglaon ti shabu a mapatta-patta nga agdagsen ti 10 a gramo ken agbalor ti P68,000.00; siyam nga empty transparent plastic sachets, dua a mobile phones; motorsiklo ken ti buy-bust money.
Iti agdama, nagtalinaed ti suspek iti Philippine National Police ditoy ciudad ti Laoag, ken sumango iti kaso a panaglabsing ti Republic Act No. 9165, wenno Comprehensive Dangerous Drugs Act of 2002.
