LAOAG CITY – Naimaldit ti maika-37 a kaso ti covid-19 ditoy probinsya wenno ni IN-C37.
Daytoy ket maysa a babai nga agtawen ti 20, residente iti Brgy. 9 iti ili ti Sarrat ken nakapulapol na ni IN-C36.
Nu pay kasta, awan ti travel history ni IN-C37, asymtomatic ken agdama a naka-admit iti ospital.
Kabayatanna, kinumpirmaran ni Brgy. Chairman Wenceslao Valdez iti Brgy. 9 a kaanakan ni IN-C36 ni IN-C37.
Inbatad na a gapu iti panagpositibo dagiti dua ket agtultuloy ti pannakaiyimplimentar ti lockdown iti sitio 1 agingga iti sitio 5.
Kuna na a naiget a saan a mapalubusan a rumuar iti pagtaengan dagiti residente iti nadakamat a lugar tapno maliklikan ti panagwaras ti virus.
Inpakaamo ti kapitan a basar iti mandato ni Mayor Remigio Medrano, agbayag iti pito nga aldaw ti lockdown kadagiti nasao a sitio.
Innayunna nga umabot iti lima dagiti dumalan iti swab test intuno Lunes kalpasan a nakapulapolda dagiti nagpositibo.
