LAOAG CITY – Naragsak nga inpakaamo ni Mayor Albert Chua iti siudad ti Batac a nagun-od ti siudad ti maikapat a pwesto iti MOST IMPROVED LGU iti intero a pagilyan iti 2020 Cities and Municipalities Competitiveness Index (CMCI) ti Department of Trade and Industry.
Segun ken ni Chua, daytoy ti mangipakita iti napintas a koordinasyon ken panagkammayet dagiti umili iti siudad ti Batac.
Innayun na a daytoy ket gapu pay iti umad-ado a negosyo nga agluklukat ken mangpadpadur-as ti ekonomiya.
Immunan nga inpakaamo ti mayor a ti nagibasaran ti DTI iti nasao a pammadayaw ket ti garaw ti komersyo iti siudad, biag dagiti umili, pasdek negosyo ken ti sitwasyon ti ekonomiya.
Innayun na nga itay napan a tawen ket naiyalat met laeng ti siudad ti nangato a rangko iti CMCI.
Mainaig iti daytoy, nagyaman ni Chua kadagiti Sanggunian Panlungsod Members (SPM), nagduduma a department heads, dagiti opisyal ti barangay ken dagiti umili iti siudad ti Batac.
Kabayatanna, ti Alaminos City, Pangasinan ti nakaiyalat ti maikanem a pwesto idinto a maika-15 ti Urdaneta City, Pangasinan.
