LAOAG CITY – Nagballigi dagiti otoridad a nangarestar iti maysa a lalaki iti naisayangkat nga Anti-illegal drug buy-bust operation iti paset ti Barangay 51-B, Nangalisan ditoy ciudad ti Laoag.
Nabigbig ti subject ti operasyon a ni Mr. Prudencio De Vera, agtawen ti 38, naasawaan, maintenance iti SM Laoag ken taga Lingayen, Pangasinan.
Inarestar a dagus dagiti otoridad ti suspek kalpasan a naglako ti maipagarop a shabu iti nagpammarang a police poseur buyer.
Nakumpiskar pay kenkuana ti maysa a pakete ti sigarilyo a naglaon ti 8 a sachet a maatap a shabu nga agdasen ti 4.4 grams, 3 ribo a pisos a nausar iti operasyon, improvised glass tube ken dagiti dadduma a personal a gamit na kas ti cellphone ken ti kwarta na a 50 a pisos.
Ti suspek ket maibilang kas Street Level Individual iti Drug Watchlist ti Philippine National Police ditoy ciudad ti Laoag.
Nagkedked metten ti suspek a nagkomento mainaig iti pannakaarestar na.
