LAOAG CITY – Inpetteng ni Barangay Chairman Gil Ramos iti Barangay Gabu Sur ditoy ciudad ti Laoag a dakkel a perwisyo ti pannakaalad ti datin a dalan nga agturong iti Sitio Torre iti nasao a barangay.
Segun kenni Ramos, ado dagiti dimmanon kenkuana a reklamo seknan iti panangalad ti pamilya Esteban gapo ta maapektaran dagiti tattao a magmagna iti daytoy.
Inlawlawag na a kidkiddawen da iti pamilya Esteban ti dokumento a mangipaneknek a kukua da ti nasao a daga ngem rumrumuar nga awan ti maipakita daytoy.
Inbatad na a gapo iti daytoy ket nagturong da iti Assessors Office ngem naduktalan nga awan ti rekord da isut gapo na a napan iti Engrineering Office ken napan met kinita dagiti maseknan ti mismo a lugar.
Kalpasan daytoy ket napan pay ti kapitan iti Dept. of Public Works and Highways (DPWH) ngem awan latta ti rekord a naala na rason a nagsubli iti Assessors Office ken ditoyen a naduktalan nga awan ti papel ti nasao a disso.
Inpakammo na pay a nagturong da iti Dept. of Environment and Natural Resources ken naibalakad kadakuada a mangipila da ti pormal a reklamo.
Mainaig iti daytoy, manamnama met ti pannaka-survey ti nasao a kalsada.
Kabayatanna, inadmitir ni Mr. Adriano Esteban nga awan ti titulo ti disso nga inaladan na ngem adda ti ummuna a saritaan da iti Dept. of Public Works and Highways.
Inpalgak na a basar iti saritaan da sakbay a maaramid ti rangtay, nakisarita ti Regional Office ti ahensya kenkuana seknan iti “swap” gapo ta madalapos ti daga na iti pannakatarimaan daytoy.
Inbatad na nga adda ti kasuratan iti daytoy a pinirmaan na ken pakairamanan ti kapitan.
Inadmitir met ni Esteban a saan na a binasa ti kasuratan ken awan ti kopya nga iggem na iti daytoy.
Innayon na a naibaga kenkuana a mapan iti Regonal Office ngem adayo rason a ti inaramid na ket inaladan na tapno ti mismo ahensya ti umasideg kenkuana.
Nupay kasta, inlawlawag ni Kapitan Ramos a ti nailanad iti kasuratan a dakdakamaten ni Esteban ket ti panangipalubos na a mausar ti lote nga adda iti sangwanan ti pagtaengan na.
Dinakamat na pay a ti ibagbaga ni Esteban a lote ket saan na a kukua gapo ta sabali ti nakainagan rason nga awan ti saritaan seknan iti “swapping”.
