LAOAG CITY – Inpasigurado ni Miss Vicka Guzman ti Secretary ni Dr. Ma. Lourdes Otayza, Medical Chief II ti Mariano Marcos Memorial Hospital and Medical Center iti Siudad ti Batac a maimbestigar a naimbag ti gamit a naipatulod iti pasyente ti ospital a saan nga indanon ti nurse.
Segun kenkuana, mangipasa ti written complaint ti maseknan babaen iti email address nga mmmh_doh@yahoo.com a maiturong mismo iti management ti ospital.
Inbatadna a mannarimaanen ti panagrebyuda kadagiti ala ti Close Circuit Television wenno CCTV camera a nakaimuntar iti asideg ti nangiyawatan ti maysa nga ina a ni Marina Viernes kadagiti gamit ti anakna a naganak iti nasao nga ospital.
No pay kasta, inlawlawagna a saan pay a mabalin nga ibutaktak dagiti nakalapda a detalye gapu ta adda ti masursurot a due process.
Kunana a no bilang man mapaneknekan nga adda ti nagsalungasingan ti maitudtudu a nurse a ni Honey Rondal ket maikkan ti maiyannatop a pannusa gapu iti panagliwayna iti panangipadanon ti serbisio medikal kadagiti maseknan nga agina.
Inpalgakna a posible a bayadan ti nadakamat a nurse ti balor dagiti gamit nga umabot iti nasurok-kumurang 20 a ribu a pisos no bilang adda ti makitada a banag a maikannniwas kadagiti naiget a maipatpatungpal a pagannurotan ti ospital.
Maipalagip a mapukpukaw dagiti gamit ti pasyente a naganak iti ospital agpapan ita a gundaway kalpasan a saan a naipadanon ti nurse dagitoy iti pasyente.
