LAOAG CITY – Inrakurak ti Estados Unidos a mabalin nga agusar ti Israel dagiti armas nga inpaay ti Amerika kas panaglabsing iti international humanitarian law gapu iti rinnupak iti Gaza.
Basar iti United States State Department, daytoy ket resonable nga i-assess a nausar kadagiti sumagmamano a gundaway kadagiti nasao nga armas manipod kadakuada.
Nupay kasta, kunana nga awan ti kumpleto nga impormasion ti gobierno ti Amerika iti nadakamat nga assessment no sadino naisubmitir daytoy iti Kongreso idi Biernes.
Mainaig iti daytoy, inbilin ti White House ti panagsukisok iti panagusar ti Israel karaman ti 6 ken dadduma pay a karaman iti conflict kadagiti armas nga inpaay ti Amerika sipod idi nangrugi daytoy iti napalabas a tawen.
Nailanad iti dokumento a gapu ta us-usaren ti Hamas dagiti civilian infrastructure para iti military purposes ken dagiti sibilyan kas human shields, narigat a maduktalan ti pudno a situasion iti ground iti active war zone manipod iti lehitimo a targets.
Nadakamat pay iti report nga inladawan ti United Nations ken humanitarian organizations ti panangikagumaan ti Israel a makissayan ti pannakaapektar kadagiti sibilyan a saan a consistent, saan nga epektibo ken saan nga umdas.
Naammoan pay ti state department a saan a naan-anay a makitintinnulong ti Israel iti panangikagumaan ti Amerika a ma-maximize ti humanitarian aid para iti Gaza kadagiti umuna a paset ti gubat.
Naiparuk-at ti report sumagmamano nga aldaw kalpasan a nagballaag ni United States President Joe Biden nga ipasardengna ti panangipatulod kadagiti bomba ken artillery shells iti Israel no ituloyda iti panangraut iti Rafah a maudi a kuta ti Hamas iti Gaza no sadino nangibakwit ti nasurok maysa a milyon a Palestino.
