LAOAG CITY – Inlawlawag ni Sangguniang Panlungsod Member Jason Perera iti maipatungpal ti experimental traffic scheme tapno mapasayaat ti panagayus ti trapiko kadagiti kalsada kangrunaanna iti Airport Road partikular iti Brgy. 15-B ditoy siudad ti Laoag.
Inbatadna a dagiti kangrunaan a panagbalbaliw ket mairaman ti pannakaiparit ti agleft-turn manipud Gilbert Bridge agingga iti dakkel a mall, Camia St., Rosal St., ken Jasmin St., no sadinno dagitoy a kalsada ket addaan met iti no parking policy manipud 7:00 AM agingga 7:00 PM.
Manamnama nga agarup 90 nga aldaw ti pannakaipatungpal ti nasao nga experimental traffic scheme ken no mapaneknekan nga epektibo ti baro nga eskema, mabalin a maipasa daytoy kas ordinansa ti siudad tapno agbalin a permanente.
Innayon ni Perera nga agsursur da inton Lunes iti centro ti Laoag nangruna iti peak hours tapno maammuan dagiti posible nga alternatibo nga scheme a mabalin nga ipatungpal.
Kabayatanna, mangnamnama ni Perera a dagitoy a wagas ti agbalin a solusion iti agtultuloy a parikut iti trapiko ditoy siudad.
