LAOAG CITY – Inpakaammo ni ABC President Mikee Fariñas a temporaryo a saan pay laeng a makastrek ditoy siudad ti Laoag dagiti aggapu iti sabali nga ili wenno siudad.
Daytoy ket maysa kadagiti pagalagadan no bilang maipatungpal ti Modified Enhanced Community Quarantine.
Iti pagtataripnong da, inbunannag ni Fariñas a masurot iti dati a naiyuswat a pannakabarikada dagiti barangay ken addaan laeng iti one-entry one-exit point.
Maipawil kadagiti residente iti maysa a barangay a mapan iti sabali a barangay, agraman pay dagiti construction workers a saan nga agnanaed iti dayta a barangay.
Malimitaran ti garaw dagiti tattao ken maipawil iti panagruwar dagiti agtawen ti 60 agpangato ken agtawen ti 18 agpababa
Kuna ni Fariñas a mabalin a makastrek dagiti delivery kadagiti essential goods ngem saan da a mabalin ti agbayag wenno agibaba da laeng kadagiti kargamento kalpasan na ket pumanaw dan.
Inbatad na a maaddaan ti massive swab testing ditoy siudad.
Innayon ni Fariñas nga agtultuloy nga agawat ti siudad kadagiti returning resident ken maidiretso da iti quarantine idinto a naipawil paylaeng ti panaghome quarantine.
Kabayatanna, nakumpirmaran met ti Bombo Radyo Laoag iti panagserra ti merkado publiko intono bigat.
