LAOAG CITY – Umabot iti siyam nga electric cooperatives ti nangipaay ti tulongda ditoy Ilocos Norte kalpasan ti nakana a dadael nga inbati ti bagyo Egay kadagiti linya ti kuryente ditoy probinsia.

Nangipatulud dagitoy ti linemen a timmulong para iti al-alisto a pannakaisubli ti kuryente kangrunaanna kadagiti “major lines.”

Mainaig iti daytoy, inpakaammo ni Atty. Athena Nicolette Pilar, pinusgan ti National Electrification Administration nga agserbi a Supervising Operations Officer ti Ilocos Norte Electric Cooperative a kalpasan ti sumagmamano nga aldaw ket natarimaan met laengen dagiti major lines ti Ilocos Norte Electric Cooperative wenno INEC.

Kunana a gapu iti daytoy ket napalaus ti yaman ken ragsak ni Gob. Matthew Marcos Manotoc.

Kunana a para iti gobernador ket awan ti maiyallubog a balikas a pangipadanon ti probinsia iti napalaus a panagyamanna iti naaramidan dagitoy para kadagiti kakailian a pannakaiyalisto ti pannakaisubli ti kuryente.

Inlawlawagna a daytoy ti rason a naisayangkat ti “send off lunch” para kadagiti nangbukel iti “Task Force Linemen” sakbay a napalubusan dagitoy a nagawid kadagiti bukudda a lugar.

Segun ken ni Pilar karaman kadagiti kooperatiba a nangipatulod ti linemen dagitoy ti Pampanga Rural Electric Service Coop (PRESCO), Aurora Electric Cooperative, Inc. (AURELCO), Pampanga II Electric Cooperative Inc (PELCO II),  Zambales I Electric Cooperative Inc (ZAMECO I), Tarlac I Electric Cooperative Inc (TARELCO I), Tarlac II Electric Cooperative Inc (TARELCO II), San Jose City Electric Cooperative (SAJELCO), Pampanga I Electric Cooperative Inc (PELCO I) ken ti Manila Electric Railroad and Light Company (MERALCO).

Kabayatanna, inbatadna a nagturong metten dagiti linemen ti Ilocos Norte Electric Cooperative kadagiti barangay tapno kitaenda no adda pay dagiti nabatbati a saan pay a naisubli ti kuryenteda.

Iti kaudian a datos ti Ilocos Norte Electric Cooperative, addan ti 98.93% iti pakabuklan ti naisublin iti suplay ti kuryente iti intero a probinsia.

Mangnamnama ni Atty. Pilar nga iti kabiitan a gundaway ket sanga gasut a porsiento a maisublin ti kuryente dagiti kakailian.