LAOAG CITY – Inadmitir ti Malacañang a saan a napintas iti imahe ni Presidente Ferdinand Marcos Jr. a mapilaan ti impeachment complaint ken inpettengna nga awan ti aniaman a pakabenepisiaran daytoy para iti administrasion.
Daytoy ti sungbat ti Palasyo iti rakurak ni Cong. Jonathan Flores mainaig iti one-year bar rule ti Konstitusion no sadinno no na-refer ken na-initiate ti maysa nga impeachment complaint iti House Committee on Justice, saanen a mabalin nga umawat ti baro a reklamo kontra iti Presidente iti uneg ti maysa a tawen.
Inbatad ni Palace Press Officer Claire Castro a saan a mabalin nga ibilang a bentahe ti nasapa a panangipila ti impeachment complaint gapu ta aniaman nga impeachment kontra iti Presidente ket adda ti dakes nga epekto iti imahe iti liderato ti pagilian.
Negatibo met iti obserbasion dagiti ekonomista ken iti pakabuklan nga ekonomia gapu ta mangitunda daytoy iti riribuk wenno kinaawan ti kumpiansa iti gobierno.
Kabayatanna, inbatad ni Castro nga awan pay ti kasiguradoan nga impormasion no naaddaanen ti panagsinnarita da Presidente Marcos ken ti anakna a ni Ilocos Norte 1st District Rep. Sandro Marcos mainaig iti naipila a reklamo.
Nupay kasta, inpetteng ti Palasyo a nalawag ken paulit-ulit ti pammilin ti Presidente iti anakna nga aramiden ti responsibilidadna kas agpanpanday linteg ken agtalinaed a patas iti proseso.
