LAOAG CITY – Inpetteng ti Malacañang a pork-barrel free ti 2026 national budget ken saanna nga ipalubos a makibiang dagiti pulitiko iti panagusar ti pundo ti gobierno.
Inbatad ni Executive Secretary Ralph Recto, nalawag iti linteg a maipawil kadagiti agpanpanday linteg a makibiang iti implementasion ti pundo nangruna iti panangipaay ti ayuda ken dadduma pay a tulong pinansial.
Mainaig iti daytoy, kadagiti farm-to-market roads, inbatad ni Recto a ti Department of Agriculture (DA) ti nangikeddeng kadagiti proyekto a mapundoan a saan ketdi dagiti pulitiko.
Inlawlawagna a ti Presidential Assistance to Farmers ket karamanen iti inlungalong a pundo ti Malacañang ken gagem a suportaran ti presio ti irik tapno maipababa ti presio ti bagas.
Kinarit ni Recto kadagiti agdudua nga urayen ken kitaen pay laeng nga umuna ti 2026 budget sakbay a babalawen gapu ta nalawag ti gagem daytoy a parmeken ti pork ken patronage politics.
