LAOAG CITY – Naiget a naglikudan ti Malacañang dagiti akusasion ni dati nga Ako Bicol Party-list Rep. Zaldy Co kontra ken ni Presidente Ferdinand Marcos Jr. a maipagarup nga isuna ti nangibilin ti ₱100-bilyon nga insertion iti 2025 national budget.
Inbatad ni Presidential Communications Office (PCO) Secretary Dave Gomez, dagiti amin nga inibbatan a rakurak ni Co ket awan ti pangibasaran ken agpapada a sayangguseng laeng nangruna ket ti Presidente pay mismo ti nangibutaktak kadagiti iregularidad iti flood control projects ken nangilungalong kadagiti addang tapno mapagsungbat dagiti karaman, maipasubli dagiti tinakaw a pundo ken urnosen ti sistema tapno saanen a maulit ti maanomalya.
Inlawlawag met ni Budget Secretary Amenah Pangandaman nga amin a pundo nga ibilbilin ti Presidente ket nakaipalaonen iti National Expenditure Program (NEP) nga aw-awagan pay a President’s Budget.
Inbatadna a ti trabaho ti bicameral conference committee ket sakupen laeng ti lehislatura ken saan a ti ehekutibo isu nga awan ti papel ti Presidente iti maibagbaga a “budget insertions.”
Mainaig iti daytoy, inpetteng ni Palace Press Officer Claire Castro, kabayatan a bumasbassit ti lubong ni Co gapu iti kinaadu dagiti alegasion a nakapalikawkaw kenkuana ket gangandatenna a liklikan dagiti isyu ken paruarenna a biktima iti babaen ti pannakairaman ti Presidente nga awan ti pammaneknek.
Pammalagip ni Castro, no pudno a karaman ni Presidente Marcos Jr., saanna a rugianan ti naun-uneg nga imbestigasion ken panangestablisar ti Independent Commission for Infrastructure (ICI).
Kinarit ti Palasyo ni Co nga agawid ditoy pagilian ken personal a patibkeren ken agsapata kadagiti salaysay daytoy no pudno a kalikagumna a paneknekan dagiti rakurakna.
