LAOAG CITY – Maysa a maladaga ken dua nga agtawen ti 11 nga ubing ti karaman kadagiti balligi a naisalakan dagiti international rescue team iti narpuog a pasdek idiay Venezuela sumagmamano nga aldaw kalpasan a timmama ti dua a nagsaruno a gingined.
Iti video nga inpakita ti United States State Department, makita ti panangisalakan iti maysa a maladaga a milagro a sibibiag manipud iti sirok ti narpuog a pasdek.
Kabayatanna, maysa nga agtawen ti 11 nga ubing a lalaki met ti naisalakan ti rescue team manipud idiay Colombia kalpasan a nabirokan a nagaburan iti agarup tallo a metro iti sirok dagiti narpuog a debris.
Nagsagaba isuna ti tukkol iti abaga ken insigida a naitaray iti ospital ngem saan a nakalasat ti ina ken kabsat daytoy iti didigra.
Adda ti maysa pay nga agtawen ti 11 nga ubing ti naisalakan ti rescue team manipud idiay Mexico iti ili ti Caraballeda.
Inbatad ni Interim President Delcy Rodriguez nga addan ti 1,430 ti kumpirmado a natay no sadinno 3,000 nga indibidual ti nasugatan idinto nga agarup kapada a bilang ti temporario nga agtaltalinaed kadagiti evacuation center.
Inlawlawagna nga insardengen ti rescue team ti search operations kadagiti sumagmamano a lugar kalpasan a naobserbaranda nga awanen ti senyales nga adda ti sibibiag a nakalasat kadagiti narpuog a debris.
Nangilatang ti European Union ti sumurok-kumurang €5 million kas emergency aid idinto a manamnama nga ianunsio ti Estados Unidos ti nayon a pundo nga itulong kadagiti naapektaran a komunidad.
Nangipadanon met ti pannakipagladingit ken panagkararag ni Pope Leo XIV para kadagiti biktima ti gingined ken nagyaman kadagiti rescuer a tumultulong iti operasion.
