LAOAG CITY – Dimmistansya ti malakanyang iti susik iti nagbaetan da Executive Secretary Ralph Recto ken Batangas 1st District Representative Leandro Leviste.
Segun ken ni Palace Press Officer Undersecretary Atty. Claire Castro, adda ti naiwayat a taripnong da President Ferdinand ”Bongbong” Marcos Jr. ken ni Recto ngem saan pulos a nadakamat ti isyu da ken ni Leviste.
Kuna ni Castro a no adda man ti personal a susik dagiti dua ket isuda laeng ti makaammo iti daytoy ken saan a makibiang ti malakanyang.
Maipalagip nga inakusaran ni Leviste ni Recto a maipagarop a nakaawat ti saan a nababbaba iti P1 bilyon a pondo manipod kadagiti kontraktor mainaig iti kampanya da idi 2025 elections.
Inpetteng pay ni Leviste ti alegasyon ti vote buying ken nangatngato a gastos iti kampanya iti ruwar ti Batangas.
Iti met biang ni Recto ket naglikudan na dagiti alegasyon ken inpetteng na a nagkedkedan na ti naidiaya kenkuana nga P400 milyon manipod ken ni Leviste kasukat ti panangpasanud na kadagiti kalaban na iti 2025 elections.
Naglikudan pay ni Recto ti aniaman a koneksyon na iti ghost wenno anomalous projects.
