LAOAG CITY – Binanatan ti Malakanyang ni Vice President Sara Duterte gapu iti panangbabalawna ken ni Presidente Ferdinand Marcos Jr. iti panagikkat ni Rep. Martin Romualdez kas House Speaker ken ti isyu ti korapsion iti national budget.
Inaramid daytoy ti Malakanyang kalpasan nga inrakurak ni Duterte a saan a nasken a palubosan ti presidente dagiti agpanpanday linteg a makapanaw iti pagilian bayat a maim-imbestigar da, ken ti panagikkat ni Romualdez tapno malisyan ti pannakairaman na iti isyu.
Inpetteng ni Palace Press Officer Claire Castro nga awan ti bileg ni Marcos a lapdan dagiti kongresista ken senador iti panagbiahe da gapu ta nalawag ti ‘separation of powers’.
Immunan a binabalaw ti Malakanyang dagiti biyahe ni Vice President Duterte a nakagastosen iti P7.4 milyon manipud iti pondo ti gobierno para iti seguridad na, idinto nga agtultuloy dagiti isyu iti anomalya ken pangta ti impeachment kontra kenkuana.
