LAOAG CITY – Saan a mapagsungbat ti Malakanyang no maiturong iti Korte Suprema ti isyu ti maipagarup a blank items iti bicameral conference committee report ti 2025 national budget.
Inbatad ni Executive Secretary Lucas Bersamin, saanna a malappedan dagiti indibidual nga agplanplano nga agturong iti Supreme Court (SC) kas ken ni Davao Rep. Isidro Ungab ken dadduma pay.
Nupay kasta, inpasingked ni Bersamin a saanda a mapagsungbat seknan iti daytoy gapu ta awan ti pakainaiganda iti bicameral report.
Iti baet daytoy, inlawlawag met ni Bersamin a nasapa pay tapno agkomento maipanggep iti nasao nga isyu.
Maipalagip nga inrakurak ni dati nga Executive Secretary ken Senatorial aspirant Atty. Vic Rodriguez nga adda dagiti sumagmano nga abugado ti agkalikagum nga iyuli iti Korte Suprema seknan iti maipagarup a blangko nga item iti bicam committee report ti 2025 budget.
Kuna pay ni Rodriguez a namnamaenna a sungbatan ti administrasion ti saan nga agpapada iti 2025 budget a maikanniwas iti paglintegan.
