LAOAG CITY – Natay ti Defense Minister ti Mali a ni Sadio Camara kalpasan ti maipagarup a suicide truck bombing iti pagtaenganna iti asideg ti kabisera a Bamako kagiddan ti nalawa a coordinated attacks kadagiti nagduduma a paset ti pagilian.
Basar iti report, maysa a lugan a nagkarga ti naruay a pagpabettak ti dimmungpar iti pagtaengan ti opisial iti Kati a maipagarup nga inwayat dagiti militante a grupo a konektado iti al-Qaeda.
Pimmusay ti sumagmamano a miembro ti pamiliana ken dadduma pay a sibilian kalpasan a narpuog ti sumagmamano a paset ti pasdek ken naapektaran ti kaparanget a mosque.
Kinumpirmaran ti state media a natay ni Camara gapu iti sinagabana a sugat kalpasan a nakirinnupak pay kadagiti rimmaot sakbay a naan-anay a pimmusay iti ospital.
Malaksid ken ni Camara, naibakwit pay ni junta leader Gen. Assimi Goïta kalpasan a tinarget ti pagtaenganna.
Naammoan a dagitoy ket maikonkonektar iti jihadist group a karaman iti al-Qaeda ken Islamic State kasta pay ti separatist group nga Azawad Liberation Front nga agop-operar iti amianan a paset ti pagilian.
Kagiddan daytoy, naipadamag ti panagsanod dagiti Russian mercenaries a karaman ti militar ti Mali manipud iti sumagmamano a lugar iti Kidal kalpasan ti sumagmamano nga aldaw ti rinnupak nupay awan pay ti opisial a kumpirmasion manipud iti Russia.
