LAOAG CITY – Natay ti maysa a malnourished a babai idiay Gaza a naibakwit idiay Italy para iti pannakatamingna.
Nabigbig ti biktima a ni Marah Abu Zuhri, agtawen ti 20 a nagturong iti Pisa kaduana ti inana iti nagpatnag a flight-da babaen ti Italian government.
Basar iti University Hospital of Pisa, nakapasar ti cardiac arrest ti biktima ken pimmusay 48 nga oras ti napalabas kalpasan a nakasangpet iti ospital.
Segun iti nasao nga ospital, nakapasar ti biktima ti nakaro a panagkuttong gubuay iti nakaro a malnutrition.
Nagballaag ti United Nations iti kumarkaro a mapaspasaran a malnutrition idiay Gaza.
Naglikudan met ti Israel nga adda ti mapaspasamak a panagbisin idiay Gaza ken inakusaranna ti United Nations agencies a saan a panangala kadagiti taraon iti borders ken panangipatulod kadagitoy.
Naammoan nga adda ti sumurok 180 nga ubbing ken nataengan ti naibakwit idiay Italy sipod nangrugi ti gubat ti Israel idiay Gaza.
Mainaig iti daytoy, inpakaammo ti Italian foreign ministry nga adda ti 31 a pasiente ti naibakwit idiay Rome, Milan ken Pisa ita a lawas nga agpapada dagitoy nga addaan ti congenital diseases ken sugat.
Ginutigot ti British government a maibakwit dagiti masakit ken nasugatan nga ubbing manipud idiay Gaza a maiturong idiay United Kingdom nga awan ti pannakaitantanna kagiddan ti panangikari ni British Prime Minister Keir Starmer a mangestablisar ti evacuation scheme.
Inrakurak ti Israeli ministry a nangrugin iti pannakaipaay kadagiti tents ken dadduma pay nga equipment para kadagiti residente idiay Gaza City.
Basar iti health ministry, adda ti 11 nga indibidual ti natay gapu iti malnutrition rason nga addan ti pakabuklan a 250.
Kabayatanna, sumurok 60 a ribu nga indibidual ti pimmusay sipod nangrugi ti gubat ti Israel idiay Gaza.
