LAOAG CITY – Inpakaammo ni Barangay Chairman Edmer Quinto, iti Brgy. Lioes iti ili ti Currimao, nga umabot iti 18 ti bilang dagiti natrace a nakapulapol dagiti nagpositibo iti COVID-19.
Kuna na a dagiti tallo a nagpositibo nga isuda IN-C113, IN-C114, ken IN-C115 ket agkakabagyan idinto nga adda ti kakabagyan da kadagiti natrace.
Segun kenni Quinto, naipatungpal a dagus ti lockdown iti Sitio Naragsak ken Sitio Namnama iti barangay da.
Mainaig iti daytoy, negatibo iti resulta ti swab test dagiti 15 a nakapulapol dagiti nagpositibo ken tallo dagiti nagpositibo nga isuda dagiti kaudian a nairakurak.
Manamnama a maipadalan da manen iti maikadua a daras dagiti 15 a nagnegatibo kalpasan ti sumagmamano nga aldaw.
Inbatad ni Quinto nga ileppas dagiti maseknan ti 14-day home quarantine.
Inadmitir na nga adda pay dagiti kabarangayan na a mangmangged a saanen napan nagubra gapu iti panagbuteng dagiti kaubraan da iti ili ti Badoc.
Nupay kasta, makasubli laeng iti trabaho dagiti maseknan kalpasan ti lockdown kadagiti nadakamat a lugar.
Innayon ni Quinto nga adda ti ipaay ti lokal a gobyerno iti ili ti Currimao para kadagiti naapektaran ti lockdown.
