LAOAG CITY – Dakkel a nayon iti birok iti panagpasada iti inaldaw-aldaw iti manamnama a pannakaipalubos ti backride kadagiti tricycle driver ditoy siudad ti Laoag.
Segun ken ni Mr. Jason Molina, maysa kadagiti tricycle driver ditoy siudad ti Laoag, daytoy ket kalpasan a manayonan ti bilang ti pasahero a mabalinda nga ilugan iti tricycle-da a manipud iti tallo laeng a pasahero ket mapagbalinton nga uppat apaman a maipatungpal ti ordinansa.
Inbatadna a masdaaw isuna no apay ita laeng a nariing daytoy a gagem ti naruay a tricycle drivers gapu ta nabayagen a kalikagumda daytoy a banag.
Gapu iti daytoy, inpalgakna a posible nga adda ti maris pulitikana ti manarimaan a main-inaw iti Sangguniang Panlungsod nangruna ket umas-asidegen ti eleksion.
Nupay kasta, kiniddawna a no naan-anay a maaprobaran daytoy nga ordinansa ket nasaysayaat no agtultuloy a maipatungpal daytoy.
Maipalagip a manarimaan ti panangrebisar ti Committee on Transportation ditoy siudad ti Laoag ti ordinansa idi 1994 a maipawil ti backride iti tricycle.
Immuna iti daytoy, no maaprobaran ti ordinansa ket adda dagiti pagalagadan a masapol a masurot kas ti nasken nga adda ti pagkaptan ti pasahero nga agian iti likud ti tricycle driver, maipawil dagiti agtawen ti 12 ken agpababa nga ag-backride ken kasapulan nga agusar ti high visibility vest no rabii.
