LAOAG CITY – Inpasigurado ni Fire Supt. Roxanne Parado, ti Provincial Firemarshall ditoy probinsya a naiget ti panangsurot da iti nagbalin a mandato ni Department of the Interior and Local Government Jonvic Remulla iti Bureau of Fire Protection.
Daytoy ket masapol a nakasuot ti body-worn-camera dagiti kameng ti Bureau of Fire Protection no mangisayangkat da ti fire safety inspections iti amin nga establisimiento.
Segun ken ni Parado, amin nga isaysayangkat da nga inspeksyon ket nakasuot ti body worn camera dagiti inspector ti Bureau of Fire Protection ditoy probinsya.
Kabayatanna, inpasingked ni Parado nga awan pay dagiti nagirenew ti business permit na a nagreklamo mainaig iti requirement ti ahensya a masapol a maaddaan ti fire extinguisher dagiti amin a pasdek negosyo tapno adda ti insigida nga usaren da no bilang adda ti mapasamak nga uram.
Innayon na a no maipapan met ti panagirekomendar dagiti kameng ti Bureau of Fire Protection iti mabalin a paggatangan dagiti negosyante ti fire extinguisher ket awan ti problema.
Inkalintegan na nga awan ti dakes na no agirekomendar da ti mabalin a paggatangan ti fire extinguisher gapu ta ammo da no siasinno dagiti otorisado a distributors ken dagiti makuna a kolurum agsipud da adda ti listaan da.
