LAOAG CITY – Inyestorya ni Jimmy Garalde, residente iti Brgy. Ablan, iti ili ti Burgos ti kapadasan na iti tengnga ti taaw nangruna idi napattog ti bangka na idi Lunes ti alas-tres ti parbangon.
Kuna na a naturong iti taaw nga addaan ti kaadayo a 12 a milya manipud iti igid ti baybay tapno agala ti tuna ken dumadara.
Saan a namnamaen ni Garalde a pimmigsa ti angin ken dalluyon iti baybay kalpasan ti nasurok maysa nga oras.
Inbatad ni Garalde nga idi agawiden ket saan na a napakadaan ti napigsa a dalluyon a timmama iti sango ti bangka na rason a napattog t bangka na.
Inkarigatan ni Garalde ti nagtalinaed iti rabaw ti napattog a bangka na gapu ta ingalot na ti bagbag na iti bangka ken adda ti floating backpack na tapno saan a malmes.
Kabayatanna, inbunannag ni Garalde nga adda ti maysa a cargo ship a nagmaris iti blue ken puraw a limmabas ngem saan da a naripar nupay agkidkiddaw ti tulong.
Kuna na nga agarup ala-una y media ti malem idi Lunes ket limmabas ti MV Unico Stella nga isu ti nakaalaw kenkuana.
Inlawlawag ni Garalde a saan da pay laeng naripar isuna iti umuna a gundaway agingga nga inpagarup ti kapitan ti nasao a barko nga ilokano a natennag crew na rason a nagsubli ti barko.
Inbatad na a naripar dagiti crew a mangalap isuna rason nga inyuswat dagiti crew ti panangisalakanda kenkuana kas kadagiti nausar a floating ring ken dadduma pay a prosesso.
Nakarikna ni Garalde ti panagkapsot bayat nga umul-uli iti agdan a sumagpat iti barko.
Kuna na nga idi nakasagpaten iti barko ket dita a dagus nga inasikaso da babaen kadagiti medics.
Inadmitir ni Garalde nga idi napattog ti bangka na ket arigen nga awan ti namnama na a malakasat gapu ti dakes a panawen.
Inbilang ni Garalde a maikadua a biag na iti pannakaisalakan na babaen kadagiti crew ti nasao a barko bayat a nagtalinaed daytoy iti sumagmamano nga oras iti tengnga ti taaw.
Nagyaman ni Garalde kadagiti nangtulong kenkuana a crew kasta met kadagiti pannakabagi ti Philippine Coast Guard a nangasikaso kenkuana.
