LAOAG CITY – Natiliw ti maysa a mangisursuro iti Ilocos Norte College of Arts and Trades (INCAT) a kabsat ti Brgy. Chairman iti Brgy. 7-B ditoy ciudad ti Laoag iti naiwayat a drug buy bust operation ti PNP Laoag ken Provincial Drug Enforcement Unit (PDEU)
Nabigbig ti subject ti operasyon a ni Jeff Agliam, 43, ken residente iti nasao a barangay.
Naarestar ni Agliam kalpasan a nagatang kenkuana iti 1 a sachet a naglaon iti mapapati a shabu nga agbalor ti sangaribo a pisos.
Malaksid iti dayta, narekobre pay kenkuana iti 10 a sachet ti maipagarup a naglaon met laeng iti shabu.
Nupay kasta, naiget a naglikudan ti suspek a kukua na dagiti naala kenkuana.
Inpetteng na a mapan na laeng kuma ited dagiti gymnastics apparatus kadagiti pagayam na idi operasyonan da.
Inadmitir ni Agliam a datin nga agususar daytoy iti ilegal a droga idi adda idiay Metro Manila.
Kunana a nagutigot daytoy nga agusar manen babaen kenni Bernardo Rafada Jr, ti imununan a naiyuswatan ti drug buy bust operation idi met laeng kalman.
Kinumpirmran ni Agliam a ni Rafada ti naggatangan na iti inusar na a maipawil a droga itay napalabas a bulan ti Disyembre 2019.
Naamoan a ni Agliam ket 15 a tawenen a mangisursuro iti INCAT.
Kabayatanna, inpasingked ni Police Chief Master Sergeant Harold Nicolas iti PDEU a ti subject ti operasyon ket top 5 drug personality iti Provincial Level ken sakop na iti intero a probinsya a paglaklakuan na
Kunana a mabalin nga associate ni Agliam ni Rafada ken posible a laklakoan na pay dagiti estudyante na iti ilegal a droga.
