LAOAG CITY – Mangipapaay ti maysa a mangisursuro a ni Mr. Marc Lawrence Pasion a taga Barangay 1 iti ili ti Bacarra ti libre a laptop iti maysa a deserving student.
Segun kenkuana, daytoy ket maysa a wagas tapno maisublina dagiti blessings a maaw-awatna iti Dios ken tapno makatulong kadagiti estudiante nga awan ti mausarna a laptop para iti panagadalna.
Gapu iti daytoy, napanunotanna a tumulong kadagiti agad-adal apaman a makalako isuna ti sangapulo nga units a laptop iti negosiona.
Inbatadna a nangrugi isuna a simrek iti negosio babaen laeng ti panangilakona ti maysa a selpon nga isu ti inusarna a pinagpuonan tapno mapataray ti negosiona.
Inlawlawagna nga iti agdama ket inbatina pay laeng ti panagbalinna kas maysa a mangisursuro tapno ad-adda a matutokanna ti panagpatarayna ti negosiona.
Innayonna a saanna met nga iwaling nga agsubli ti panangisuro kadagiti estudiante ngem mamati isuna nga amin a mapaspasamak iti biag ket adda ti rasonna.
