LAOAG CITY – Saan nga umannugot ni Mr. Edgar Dela Cruz, maysa kadagiti mangngalap iti Brgy. 32-A Lapaz ditoy siudad ti Laoag a ti nababa a salinity level ti danom iti nakapupokan dagiti taraken nga ikan ti kangrunaan a rason no apay a matmatay dagitoy.
Segun kenkuana, masdaawda no apay a nalibeg ti danom ket saan met a kastoy iti napasamak iti napalabas a tawen.
Gapu iti daytoy, kunana a mamati isuna a gapu iti kinalibeg ti danom ti mangitunda ti pannakatay dagiti tarakenda nga ikan.
Inbatadna a gapu iti agtultuloy a situasion iti karayan ket arig sayang payen dagiti ipakpakanda kadagiti ikan.
Innayonna a dakkel a pukaw para kadakuada ti agdama a mapaspasaranda a situasion.
Maipalagip nga inpetteng ni Engr. Shiela Opelac, City Agriculturist a ti nababa a salinity level ti danom iti nakapupokan dagiti taraken nga ikan dagiti mangngalap iti Metro Lapaz ti kangrunaan a rason no apay a matmatay dagiti pupokda.
