LAOAG CITY – Ileppasen ti transport group a Manibela ita nga aldaw ti three-day strike na nga agngudo kuma intono bigat iti baet ti apela ti Land Transportation Franchising and Regulatory Board.
Inrakurak ti Manibela a ti desisyon da ket kalpasan ti pannakitaripnong da kadagiti opisyales ti Land Transportation Franchising and Regulatory Board ken ti Department of Transportation.
Ti transport strike ket inrugi ti Manibela di kalman kas panangkontra da iti kurapsyon iti pagilyan.
Segun kenni Manibela chairperson Mar Valbuena, nakisarita dagiti opisyal nga isardeng da ti protesta gapo ta aminado da a marigatan dagiti pasaheros.
Inlawlawag na nga itan ti maudi nga aldaw ti transport strike ken intono bigat ket agbalinen a normal.
Kabayatanna, inrugi met ti transport group a PISTON ti one-day protest action kontra iti kurapsyon gapo kadagiti reports mainaig iti anomalya a flood control projects ti gobierno.
Sumagmamano kadagiti miembro iti grupo ket nagtitipon iti E. Rodriguez Avenue corner Araneta Avenue idiay Quezon City ken adda pay ti 11 strike centers kadagiti nagduduma a lugar iti Metro Manila.
