LAOAG CITY – Maysa nga agtawen ti 19 a nail technician idiay Nigeria ti nangpadas a magun-od ti Guinness World Record iti babaen ti awan sarday a panagkulayna ti nailpolish wenno kyutiks iti uneg ti tallo nga aldaw.
Segun iti nail technician a ni Lisa Dachor, kalikagumna a maipaima kenkuana ti titulo a “Longest Artificial Nail Painting Marathon” tapno agbalin nga inspirasion isuna dagiti single ken teenage mother idiay Plateau, Nigeria.
Naiyuswat ti record breaking attempt ni Dachor iti maysa nga events center iti lugarda nga inatendaran dagiti pagayam, kabagian ken dagiti kaarrubana. Nangrugi ti marathon-na idi Mayo 1 ken naglippas iti Mayo 3.
Tapno bigbigen ti Guinness World Records ti world record attempt-na, masapol a makaikabil daytoy ti kyutiks iti 60 a kuko iti uneg ti maysa nga oras. Iti tulong dagiti pagayamna a nagserbi kas witness ken tagabilang ti oras, nasurot daytoy ni Dachor ken nakakulay daytoy ti 4,000 a kuko iti uneg ti 72 nga oras.
Tallo a tawenen nga agtartrabaho ti nail technician ni Dachor ken mangnamnama daytoy ti tulong ti Guinness World Records ket makita iti lubong a talented ken nalaing a nail technicians dagiti babbai ti Nigeria.
Iti agdama, manarimaan ti panagrebyu ti Guinness kadagiti naisubmitir a bidyu ni Dachor ken maiyur-uray pay laeng ti pannakaipaay kenkuana ti world record certificate.
