LAOAG CITY – Inpakaammo ni Dr. Rodrigo Catcatan, mangidadaulo ti City Health Office nga awan pay ti nairekord nga human rabies ditoy siudad ti Laoag.
Segun kenkuana, iti agdama ket adu laeng dagiti agturturong iti opisinada tapno agpabakuna iti anti-rabies vaccine gapu iti pannakagat wenno pannakakaramot dagitoy.
Inbatadna nga ita a panawen ti kalgaw ket kaaduna manen dagiti makagkagat wenno makarkaramutan nga indibidual kadagiti tarakenda nga aso ken pusa.
Inlawlawagna nga umdas met pay laeng ti suplay ti anti-rabies vaccine iti opisinada.
Kunana nga adda ti bayadan para iti umuna a dose idinto a libre met ti maudi a dose.
Kabayatanna, nagpalagip ni Catcatan kadagiti umili a kasapulan a pabakunaan dagiti tarakenda nga aso ken pusa tapno masigurado ti kinatalged ken saan a mairisgo ti biagda.
