LAOAG CITY – Inbilin ti Manila Regional Court Br. 52 ti Bureau of Immigration a saanen a palubosan a makaruar pay ti pagilian dagiti respondents iti ‘plunder case’ nga adda ti pakainaiganna kadagiti maanomalya a proyekto ti flood control.
Iti dokumento nga inpakita ti Department of Justice, nakailanad iti pammilin ti korte idi Pebrero 10 iti agdama a tawen a lappedan dagitoy a makatalaw ditoy Pilipinas.
Nabilin pay a mairaman dagitoy iti Hold Departure List basar iti inparuk-at a pammilin nga inyisyu ti Presiding Judge a ni Juan G. Rañola Jr.
Nadakamat a dagiti saan a patalawen ditoy ket partikular da Sen. Jinggoy Estrada, dati a Department of Public Works and Highways Sec. Manuel Bonoan, dati nga Usec. Roberto Bernardo, Gerard Opulencia ken Henry Alcantara.
Inbatad ni Department of Justice Spokesperson Atty. Polo Martinez, ti panangiyisyu ti ‘precautionary hold departure order’ ket kalpasan nga adda ti nakita ti korte a probable cause wenno posible a rason tapno mabalin nga aglibas dagiti respondents tapno saan a maarestar.
Maipalagip a naiwayat idi kalman ti preliminary investigation mainaig iti reklamo a plunder a sangsangoen dagiti nadakamat a respondents no sadinno a simmango ditoy ti dati a sekretario ti Department of Public Works and Highways a ni Bonoan.
Inbatad ni dati a Sec. Bonoan, nangisubmitir isuna ti counter-affidavits mainaig iti reklamo a plunder a naipila kontra kenkuana ti National Bureau of Investigation – Department of Justice Public Works and Bid Rigging Task Force.
Kabayatanna, kiumpirmaran ti Bureau of Immigration a naawatnan ti pammilin ti korte a lappedan ti panagtalaw dagiti respondents.
Iti mensahe ni Immigration Spokesperson Dana Sandoval, naikabilen ti ‘precautionary hold departure order’ iti centralized database ti ahensia.
