LAOAG CITY – Natiliw ti maysa a mannalon a maibilang kas Most Wanted Person ditoy probinsya kalpasan ti 36 a tawen a panaglemlemmeng na idiay Tarlac City.
Segun ken ni Police Major Joseph Tayaban, ti chief of police iti ili ti Badoc, ti akusado ket agtawen ti 56, naasawaan ken residente iti Barangay Lacuben iti ili ti Badoc.
Inbatad ni Tayaban a natiliw ti akusado babaen ti bileg ti maysa a warrant of arrest gapu iti kaso na nga Illegal Possession of Firearms and Ammunitions.
Naamoan a ti warrant of arrest ket naiparuk-at paylaeng idi Marso 25, 1987 ngem saan a nabirukan dagiti otoridad ti suspek agingga nga iti panagbakasyon na ditoy probinsya ket nagpa-reissue ti Philippine National Police iti nasao a warrant of arrest.
Nairekomendar ti 30 ribo a pisos a piyansa ti akusado para iti temporaryo a pannakawaya-waya na.
Nagtalinaed ti akusado iti kustodyar ti Philippine National Police iti ili ti Badoc.
