LAOAG CITY – Inlawlawag ni Provincial Agriculturist Norma Lagmay a no nakaawat dagiti mannalon ti Rice Farmers Financial Assistance ket mabalin latta nga agbalin a benipisyaryo ti Social Amelioration Program ti DSWD no laketdi kwalipikado.
Daytoy ti maysa kadagiti napagsasaritaan da iti naiyuswat a taripnong.
Segun kenni Lagmay, dagiti nakaawaten ken umawat to pay a mannalon a naapektaran ti Rice Tarrification Law ket benipisyaryo da idi pay laeng awan pay ti Covid-19 pandemic a paspasaren iti agdama.
Kunana a kayat na a sawen daytoy ket mabalin latta a makaawat dagiti mannalon ti ayuda manipud iti DSWD ken ti DA gapo ta agsabali daytoy.
Inpetteng na nga uray propesyunal dagiti asawa dagiti mannalon ken no kwalipikado na nga umawat ti RFFA ket awan ti problema.
Mainaig iti daytoy, kuna ni Lagmay a basar ti datos da ket addan ti 19 a ribo a mannalon ditoy probinsya ti nakaawat ti lima ribo a pisos manipud iti ahensya.
Inbatad na a basar iti planting calendar, dagiti ummuna nga agraep ket mabalin nga isuda ti ummuna a maikkan ti bin-i kas iti ili ti Solsona, Piddig, Dingras, Marcos ken Banna.
Binalakadan na pay dagiti mannalon a mapan da iti opisina ti DA iti lugar da tapno agpailista ti nagan na.
