LAOAG CITY – Balligi a naarestar ti maysa a mannalon a maibilang a wanted person iti probinsia ti La Union iti Barangay San Julian iti siudad ti Batac.
Segun ken ni P/Lt. Col. Adrian Gayuchan, Hepe ti Batac City Police Station, nabigbig ti suspek a ni Edwardson Dagupion alyas Ibong, agtawen ti 42, balo ken residente ti Barangay Morong iti ili ti Badoc.
Inbatadna a natiliw ti suspek babaen ti bileg ti warrant of arrest nga inyetnag ni Hon. Ethel Jaravata, Presiding Judge ti Regional Trial Court iti Branch 32 idiay Agoo, La Union.
Inlawlawagna a sumangsango ti suspek ti kaso nga attempted murder ken unlicensed firearm no sadinno a nairekomendar ti 120 a ribu a pisos a pagpiyansana para iti temporario a pannakawaya-wayana.
Malaksid iti daytoy, sumangsango pay ti suspek ti kaso a murder nga awan ti nairekomendar a piyansana.
Innayonna a nagtalinaed iti pagbaludan ti suspek nga aggapu daytoy iti maysa nga ospital gapu ta manarimaan ti pannakaipadalanna iti dialysis.
