LAOAG CITY – Nagsagaba ti sugat iti nagduduma a paset ti bagi ti maysa a mannalon kalpasan a dinanog-danog isuna ti kinainomanna a padana met laeng a mannalon iti Brgy. 25 Callaguip iti ili ti Paoay.
Nabigbig ti biktima a ni Wilbert Labasan, agtawen ti 56, naasawaan idinto ti suspek ket ni Mario Oamil y Donato, agtawen ti 49, awanan asawa nga agpada dagitoy a residente iti nasao met laeng a barangay.
Basar iti Paoay Municipal Police Station, kabayatan nga agiinom ti biktima ken ti suspek iti maysa a minatayan ket kellaat a pinabasol ti biktima ti suspek no apay a mapukpukaw ti hose-na iti pagtaltalonanna.
Gapu iti daytoy, adda ti nabara a panagsinnungbat dagiti dua agingga nga inbato ti biktima ti shot glass iti muging ti suspek.
Dagus a nagtaray ti biktima nga umadayo iti lugar ngem nakamatan ti suspek a nangitunda ti panangdanog-danogna kenkuana iti namin-adu a daras.
Naammoan a naitaray ti biktima iti Mariano Marcos Memorial Hospital and Medical Center iti siudad ti Batac para iti naan-anay a pannakatamingna.
Kabayatanna, dagus met a natiliw ti suspek ken nagtalinaed iti Paoay Municipal Police Station.
