LAOAG CITY – Dismayado ni Mr. Ferdinand Aquino, ti Presidente ti Bongga Pump 3 Western Irrigators Association iti Barangay Tangid, Bengcag ken Zamboanga ditoy ciudad ti Laoag gapo iti agdama a presyo ti irik.
Segun kenni Aquino, makita dan a lugi dagiti mannalon gapo ta kalpasan ti iduduprak ti Super Typhoon Nando ket nakaro ti epekto na iti mula da a pagay ken dagiti irik a ngimmisit.
Kunana nga iti agdama a presyo ti irik, umabot iti 10 agingga iti 11 a pisos iti kada kilo ti kagapgapas idinto a 13 agingga iti 15 pesos met ti nabilag nga irik.
Inbatad na a gapo iti agdama a presyo ket dakkel ti lugi dagiti mannalon wenno saan da a maparuar ti gastos da iti panagtalon nangruna no adda manen ti kalamidad.
Inlawlawag na nga iti kada ektarya a talonen da ket umabot iti agarop 50 a ribo a pisos ti magastos na ken makaapit da iti pito agingga iti 10 a tonelada no napintas ti panawen wenno awan ti mangdadael iti mula da.
Gapo iti daytoy, immapela ni Aquino kadagiti opisyal ti gobierno a manayunan ti ayuda a maibunbunong kadagiti mannalon kas iti abuno wenno maipababa ti presyo daytoy.
