Nagsagaba ti sugat ti maysa a mannalon kalpasan a binagkong ti construction worker iti Brgy. Saludares iti ili ti Dingras.
Nabigbig ti biktima a ni Leonard Vicente y Ostanio, agtawen 31, awanan asawa, mannalon idinto a ti suspek ket ni Edcel Corpuz y Foronda, agtawen 22, baro, construction worker ken agpada dagitoy a residente iti nasao a barangay.
Segun ken ni Pol. Major Ryan Retotar, ti chief of Police iti PNP Dingras, adda iti pasken nga inatendaran dagiti maseknan ket dita a naggi-inom da.
Kuna na a kabayatan ti panaggi-inom da ket adda ti nagbalin a nabara a diskusyon iti nagbaetan da Vicente kenni Corpuz.
Inpakaammo ni Retotar nga apaman a pumanaw kuman ti biktima ket pinakamatan ti suspek a binagkong.
Gapu iti daytoy, nagsagaba ti sugat iti bakrang ti biktima ken dagus a naitaray iti Dingras District Hospital para iti pananakatameng na ngem naiyakar met laeng iti Mariano Marcos Memorial Hospital and Medical Center iti siudad ti Batac.
Iti agdama, nagtalinaed iti kustodyar ti PNP Dingras ti suspek.
