LAOAG CITY – Kalikagum ni Sen. Imee Marcos a matungpal ti arapaap ti amana a ni dati Presidente Ferdinand Marcos Sr. a mapasilawan amin a lugar iti intero a pagilian.
Segun kenkuana, in-inot a matungpal daytoy iti babaen ti naiget a pannakikoordinar ti Ilocos Norte Electric Cooperative kenkuana.
Mainaig iti daytoy, mapasilawan dagiti lugar a saanna pay inekspektar nga awan pay koneksion ti kuriente kas ditoy suidad ti Laoag ken dadduma pay nga ili babaen ti “Pasilaw ni Manang Imee” program iti tulong ti nasao a kooperatiba.
Malaksid iti daytoy, inbatadna nga ado pay dagiti kalikagumna a mapasamak para iti pagilian kangrunaanna ti pannakapalag-an dagiti tattao maipanggep ti bayadanda iti kuriente, kas ti pannakaiyimplementar ti pannakaikkat ti systems loss ken value added tax.
Innayonna pay a masapol nga adda ti “Linemen Day” wenno pannakaipaay ti pammigbigbig kadagiti linemen gapu ta patienna a narisgo ti trabahoda.
Naamoan a 616 a pagtaengan dagiti napasilawan babaen ti nasao a programa manipud iti nagduduma nga ili ken suidad bayat ti Sitio Electrification Ceremony a naangay ditoy suidad.
Kabayatanna, binigbigna ti Ilocos Norte Electric Cooperative gapu ta uray sadinno ti pangibilinanna kadagitoy ket ad-adda a nakasagana a tumulong iti sabali a probinsia no kasapulanda.
Nagyaman ni General Manager Perry Marinez ti agtultuloy agtultuloy a suporta ni Senador Imee Marcos ken binigbigna ti programa ti Senador a dakkel a tulong iti kooperatiba tapno ad-adda pay a mapapintas ti mapanda ipaay ti serbisioda.
Kabayatanna, nagyaman met ni Mayor James Bryan Alcid iti kooperatiba, kangrunaan ken ni Martinez ken Sen. Marcos.
Patienna a napateg daytoy a programa gapu ta makatulong ti panagprogreso iti tunggal lugar a pakaipaayanna ken mangted ti ad-adda a nalawag a masakbayan.
