LAOAG CITY – Pimmusay ti maysa a mannalon kalpasan a nagbekkel iti Brgy. Nalbo iti ili ti Pasuquin.
Daytoy ti inpakaammo ni PMaj. Vencioly Luzano, ti hepe iti nasao nga ili.
Inpakaammo ni Luzano a nakaawat da ti report nga adda ti nagpakamatay iti nasao a barangay ken dagus a nagturong ti kapulisan iti lugar ken nadanon da ti nadasay a biktima.
Inbatad na a basar iti naisayangkat nga imbestigasyon, mapan koma dagiti kapamilya na iti kubo daytoy nga adda iti tengnga ti taltalon tapno mapan da agatendar ti pasken.
Nu pay kasta, kuna na a dita a nakita a nakabitin ti biktima iti uneg ti kubo na ken awanen ti anges daytoy.
Mainaig iti daytoy, inbatad ni Luzano a basar iti palawag dagiti kapamilya ti biktima ket awan ti nadakdakamat daytoy a problema wenno adda dagiti nakariri na.
Naamoan a sakbay ti panagpakamatay ti biktima ket nakiinom pay laeng.
Kabayatanna, naduktalan iti kubo na ti maysa a serbesa ken ti lata a nagyanan ti pulutan na.
Rimuar iti resulta ti eksaminasyon ti municipal health officer a natay ti biktima gapu iti asphyxia due to strangulation.
